Nun trovo cchiù nisciuno....

 

Nun trovo cchiù nisciuno

ca me rassumiglia

eppure songo mamma , pate , figlio

so’ l’ommo ‘e chi me tene

tutt’’e juorne affianco

allero, stanco

e a vvote muorto ‘e suonno

ma ancora cu ‘a pacienza

ca serve pe ghj’ ‘nnanze

cu sti dulure ‘e panza

c’’a vita ce sta danno

cu ‘e danne ca ce fà

juorno pe ghiuorno

senza se piglia scuorno.

 

Quann’ero piccerillo

me bastava

na mazziata ‘e culo,

mò nun avasta niente

e stamme chiuse dinto

cu ll’acqua e ‘o sole

o cu ‘nu male ‘e diente

ca n’è rimasto

ancora qualcheduno.

 

M’affaccio ‘e veco ggente

ca se ne fotte

‘e tutte ‘e cumandamente

c’’o guverno mette

ca nun se po’ dà cchiù

nu vaso a n’ato

si nun te lieve ‘a maschera

e piglie n’affiaciata,

l’elmetto

‘e guante gialle

ca qualcuno mette

si nun te si lavate

‘e mane, ‘a faccia, ‘a capa

ca nun è bbona cchiù

s’e ruvinata

cu tutte sti penziere malamente

ca è custretta a fà.

 

Dimane che sarrà ?

‘O sole sponta,

ma ‘mpont’’o vico

s’è sistemato e guarda

‘a ggente

chello ca vaie facenno.

 

Ne truove uno ‘o juorno

sempe pronto

ma quanno ‘a luna sponta

l’haie già cagnato.

 

Chillo nun era bbuono,

e po’ chill’ato

teneva ‘a capa sciacqua

peggio d’’o virus.

 

Mangianno ‘o pere e ‘o musso

se crere ca sta buono.

Ih c’ommo ‘e lusso ca m’ero truvato !

 

Chist’ato s’è addermuto

mentre cammenava.

Addò l’aggio pigliato nun ‘o saccio.

Pare nu pere  ‘e alaccio.

 

Tene nu riscenziello

ogne munento

e ‘a sera se va a chiurere

dint’a nu cunvento

dint’a na nicchia

manco si fosse già

nu pataterno.

 

Nisciuno cchiù s’’a sento

e prendere n’impegno.

Si se ne cara ‘a mpigna

dimane chi ce ‘a mette

ca stanno a sciacquettià

uno peggio ‘e n’ato?

 

Gioacchino Ruocco

Ostia Lido           05.11.2020.  h 06,50